ILOILO CITY – Nakaginhawa sang madalum ang mga Singaporeans mangin ang mga Pinoy sa amo nga pungsod, matapos ang maragtason nga pag-atubangay nanday US President Donald Trump kag North Korean leader Kim Jong Un.
Ginpahayag ni Bombo Radyo international correspondent Mercy Cacan nga sa kabug-usan sang summit kahapon, kaangay nga nag-untat man ang pagtiyog sang kalibutan para sa Singapore.
Apisar nga handum sang tanan ang kadalag-an sang amo nga meeting, indi madula suno kay Cacan ang kahangawa nga posible magpalpak ang summit.
Isa sa ginbantayan suno kay Cacan kun mag-walkout si President Trump nga pamahog sini sadto, sa ti-on nga wala sila sang may makasugtan ni Kim Jong Un.
Apang matapos ang summit, nagkalipay ang mga pumuluyo sang Singapore nga nangin kabahin sila sang maragtas nga ginbantayan man sang bug-os nga kalibutan.
Samtang ginpahayag ni Cacan nga balik na sa normal ang sitwasyon sa Singapore kun sa diin wala na ginhugtan ang seguridad, sumugod sang nakahalin kagab-i ang duha ka lider.