AKLAN – Ang una nga pagkapaslaw sa pasinawan ang nangin inpirasyon sang isa ka single mom agud nga makapasar sa 2018 Bar Examinations.
Isa si Atty. Christine Mobo sang Aklan, sa 1,800 ka mga Bar Exam passer sa gin-anunsyo sang Korte Suprema sang nagligad nga Mayo 3, 2019.
Sa interview sang Bombo kay Atty. Mobo, iya ginpahayag nga wala sang katupong ang iya kalipay sang nahibalu-an nga nakapasar siya sa pasinawan.
Ginpahayag ni Atty. Mobo nga ang iya iloy ang nag-impluwensya sa iya agud nga mag-eskwela sang Law matapos nga maka-graduate sa kurso nga Bachelor of Arts in Broadcast Communication sa University of the Philippine Visayas.
Sang nagatuon pa lang siya sa Law, ginpahayag ni Atty. Mobo nga kinahanglan niya nga balansehon ang iya tion sa pag-eskwela kun gab-i, pagtrabaho kun adlaw kag sa pag-atipan sang iya anak.
Bisan siya ang indi man makapati nga iya nasarangan ang mga pagtilaw sa iya kabuhi tubtub nga nakatapos sa Law.
Sa una niya nga pagkuha sang pasinawan, gin-ako sang natungdan nga nagpabaya siya sa review kag kasubong nga wala sang labot sa mangin resulta sang iya pagkuha sang Bar Exams.
Sa una, ginpahayag ni Atty. Mobo nga masakit man para sa iya nga wala siya nakapasar sa Bar exams.
Sang iya nakita nga gamay na lang kun tani nga puntos kag makapasar na siya, kasubong nga nabuhi-an siya sang paglaum kag nagdesisyon nga liwat nga magkuha sang pasinawan.
Nagtutum sa review si Atty. Mobo nga amo ang rason sang iya nga pagkapasar sa mabudlay nga Bar exams.
