Indi man mamilit ang Barangay Sinikway, Lapuz sa paghatag sang 1.7 million pesos sa Iloilo City Government para sa pagbakal sang COVID-19 vaccines kun indi ini pagpasugtan nga buhinan ang budget halin sa Barangay Development Program (BDP).
Sa interview sang Bombo Radyo kay Punong Barangay Corazon Coo, iya gin-athag nga donasyon nila ini nga kwarta kag handa sila nga i-share ini sa syudad.
Suno kay Coo, kun maestablisar ugaling nga indi pwede buhinan ang ila P20 million nga pondo halin sa BDP, itigana na lang nila ang kwarta para sa road elevation bangud masami nga ginabaha ang ila nga lugar.
Ang iban pa nga kadtuan sang BDP fund sang Sinikway, Lapuz amo ang cash-for-work program (P1 million); installation of solar-power streetlights (P10 million); kag construction of two-storey building nga may complete basic facilities (P5.7 million).
Ang Sinikway, Lapuz isa sa anum ka recipients sang BDP sa Iloilo City.Ang BDP amo ang programa sa idalom sang National Task Force to End Local Communist Armed Conflict (NTF-ELCAC) kun sa diin may yara sang P20 million nga ginhatag sa recipient barangay nga gindeklarar nga hilway sa insurhensya.
Lakip sa dapat gamitan sang P20 million nga pondo amo ang farm-to-market road, classrooms, water and sanitation systems, health station, kag livelihood projects.
