ILOILO CITY – Nagakadapat nga ipahangup sa pumuluyo sa probinsya sang Iloilo ang sistema sang proyekto sa idalom sang National Task Force to End Local Communist Armed Conflict.
Ini ang ginpahayag ni Iloilo 2nd District Senior Board Member June Mondejar bangud nga madamo pa ang proyekto sa idalom sang task force nga wala natapos sang Disyembre 31, 2022.
Bangud sini, ginbalik sa national government ang wala nagamit nga pondo.
Sa probinsya sang Iloilo, naglab-ot sa P132 million nga pondo ang wala nagamit gikan sa P720 million nga para kuntani sa pagpatuman sang mga proyekto.
Pila sa mga ginalantaw nga rason sang delayed kag wala matapos-tapos nga proyekto amo ang bagyo nga nagluntad sa probinsya kag matag-as nga lugar nga mabudlay taklaron dala ang materyales.
Suno sa iya, wala na sang extension pa ang pagpatuman sang mga proyekto sa idalom sang task force.
Una na nga nagdangup kay Interior Secretary Benhur Abalos si Governor Arthur Defensor, Jr. may kaangtanan sa sini nga problema.
