Ginpaidalom sa surgical lockdown ang pila ka pamalay sang Sitio Lagbas, Hoskyn, Jordan, Guimaras umpisa las 12:01 sang kaagahon subong nga adlaw, Mayo 31 kag magalawig sa Hunyo 4.
Ini ang kasunod man sa ginpapanaog nga Executive Order ni Jordan, Guimaras Mayor Ruben Corpuz agud mapunggan ang paglatnanay sang COVID-19.
Sa interview sang Bombo Radyo kay Punong Barangay Boyet Monreal sang Sitio Lagbas, Hoskyn, Jordan, Guimaras, iya ginpahayag nga una nga nagpositibo sa COVID-19 ang siyam ka myembro sang isa ka pamilya sa amo nga lugar.
Sa subong, nakapaidalom na sa istrikto nga home quarantine ang amo nga pamilya lakip na ang natumod nga mga close contact.
Suno kay Monreal, lakip sa mga ginpaidalom sa surgical lockdown amo ang 46 ka mga panimalay.
Ginpahayag sang punong barangay nga may yara naman sila sang ipanagtag nga food packs kag iban pa nga kinahanglanon sa mga pumuluyo nga i-lockdown sa sulod sang apat ka adlaw.
Nahibaluan nga as of May 29, nagsaka na sa 540 ang total confirmed cases sang COVID-19 sa probinsya sang Guimaras.
Sa 540, lima diri ang panibag-o nga kaso, 74 ang active cases, 458 ang numero sang mga nakarekober kag walo naman ang ginbawian sang kabuhi.
