𝗟𝗔𝗣𝗨𝗭, 𝗜𝗟𝗢𝗜𝗟𝗢 𝗖𝗜𝗧𝗬 — Nagalala na ang sitwasyon sa area sang Block 4, 7, kag 12 sang Brgy. Sinikway kag Brgy. Don Esteban, Lapuz, Iloilo City subong nadeklara na sang Philippine Atmospheric, Geophysical, and Astronomical Services Administration (PAGASA) ang opisyal nga pagsulod sang tig-ululan sa Pilipinas.
Sa interview sang Bombo Radyo kay Punong Barangay Efren Cenayo sang Brgy. Don Esteban, Lapuz, Iloilo City, iya ginpahayag nga kun magtupa ang mabaskog nga ulan, madasig nga nagasaka ang tubig-baha sa mga panimalay bangud wala na naga-function ang mga drainage bangud buta sang basura.
Suno kay Cenayo, dako ang posibilidad nga ang Budbudran Creek ang makabulig sa pagresolba sang pagbaha sa ila nga lugar kun ini ang matigayon na nga matapos.
Apang, tubtob subong, nagapabilin nga wala matapos-tapos ang rehabilitasyon sang nasambit nga creek.
Ginalantaw naman sang natungdan nga ang paghuman sang creek ang mangin solusyon sa madugay na nga problema sa baha sang mga residente.
Ginpondohan naman ang Budburan Creek sang budget nga P100 million, apang pananglitan nga nag-untat ang rehabilitasyon bangud sa ginduso nga pag-ilis sang disenyo.
Nahibaluan nga sang 2019 pa sang nagsugod sang drainage project ang Iloilo City District Engineering Office apang, pila sa mga proyekto ang sa subong napuno na sang mga basura.
