ILOILO CITY – Organisado na ang sitwasyon sa ODM Sportswear-Ungka Branch kasunod sang pagdugok sang customers kahapon nga adlaw, Oktubre 14, agud makabakal sang de-kalidad nga sapatos sa barato nga presyo.
Sa interview sang Bombo Radyo kay Jeremiah Obera, isa sa mga tag-iya sang nasambit nga shop, iya ginpahayag nga gilayon nga ginpahamtangan sang compliance officers ang guwa kag sulod sang shop sang nagdinaguso ang mga customer.
Suno kay Obera, mismo siya ang wala naglaum nga magadagsa ang manugbakal kun sa diin tuman ka laba ang pila sa guwa sang shop.
Ginpahayag ni Obera nga bilang pagsunod sa minimum health protocol, anum lang ka customer ang ginapasulod bangud nga limitado ang espasyo sa sulod sang shop.
Gin-athag man sang natungdan nga indi dapat magdali ang mga customer bangud nga ang special offer ang magalawig tubtub nga may yara sang stocks nga maga-abot.
