ILOILO CITY — Makahalawat-hawat ang sitwasyon sang isa ka multipurpose building sa Barangay Benedicto, Jaro, Iloilo City bangud apisar nga nahuman na ini, indi sa gihapon magamit sang mga residente.
Sa interview sang Bombo Radyo kay Punong Barangay Abelardo Salting, iya ginpahayag nga fully furnished na ang multipurpose building sa diin may centralized nga aircon ini kag handa na kuntani nga i-occupy kag gamiton sang mga residente.
Suno kay Salting, kapin walo ka bulan antes natapos ang pagtukod sang building kag natapos ini sang bulan sang Pebrero subong nga tuig.
Ginpahayag man sini nga nagapangayo pa sang sketch plan sang proyekto ang Department of Public Works and Highways (DPWH) rason nga wala pa ini na-turn over agud magamit.
Nagpasalig naman ang natungdan nga ma-comply ang mga dokumento agud pormal nga ma-turn over kag magamit na ang P5 million nga project sang Iloilo City Government.
