Matawhay sa gihapon ang banwa sang San Dionisio, Iloilo kun sitwasyon sang pulitika ang istoryahan.
Sa interview sang Bombo Radyo kay San Dionisio Mayor Larry Villanueva, iya ginpahayag nga ini sa pihak sang pagkalakip sang banwa sa Yellow Category sang Election Areas of Concern sa diin may yara sang election related violence kag may intense political rivalry.
Suno kay Villanueva, sa subong wala pa sang na-report nga may aktibo nga private armed groups (PAG’s) apang gin-ako niya nga may pulitiko gid man sadto nga nagahupot sang kaangay nga grupo.
Gin-ako naman sang opisyal nga ginalauman niya nga mangin mainit ang mayoralty race sa San Dionisio bangud apat ang nagapadalagan nga ginalakipan nanday Lydia Antonio (Independent); mag-utod nga Eusebio Lopez (Independent) kag Peter Paul Lopez (LP); kag si incumbent Mayor Larry Villanueva (NP).
