Na-eleher bilang presidente sang Sri-Lanka ang six-time prime minister nga si Ranil Wickremesinghe, ang suod nga kaalyado sang ginpahalin nga presidente sang pungsod.
Nakakuha si Wickremesinghe sang 134 votes sa parliament, mas mataas sa 82 nga nakuha sang iya kasumpong.
Ginpatigayon ang pagbinotohay kasunod sang pagtal-as ni anay president Gotabaya Rajapaksa gikan sa pungsod matapos nga ginsulod sang mga naga-protesta ang presidential residences kag iban pa nga government buildings bangud sa tuman nga kaakig sa iya mismanagement sa nagakatabo nga krisis sa ekonomiya.
May mga protesta man sang nagliligad nga nagapanawagan nga pahalinon si Wickremesinghe bilang prime minister, apang nagpakatig-a ini kag ginbaton pa ang tanyag nga mangin acting president sang naghalin na ang anay presidente.
Ang kadalag-an sini sa parliament ang kasunod man sang pagsuporta sang kadam-an sang mga opisyal halin sa main party, ang Sri Lanka Podujana Peramuna (SLPP) nga dominado sang Rajapaksa family.
Mabudlay ang atubangon ni Wickremesinghe sa iya termino bangud naga-eksperyensya ang pungsod sang tuman kalala nga krisis — kulang ang pagkaon kag gatong, kag nadulaan pa sang salig ang publiko sa parliament. ##
