ILOILO CITY– Siyam tanan ka mga commercial establishment ang ginduso nga ipasarado bangud sa paglapas sa guidelines sang Executive Order 46 nga ginpaguwa ni Iloilo City Mayor Jerry Treñas.
Sa interview sang Bombo Radyo kay Mr. Nestor Canong, pinuno sang Task Force on Moral and Values Formation, iya ginpahayag nga mismo ang composite team nga nagapatigayon sang inspection sa bars ukon disco bars ang nagduso sang closure.
Suno kay Canong, pila lamang sa naglapas sa guidelines ang ginalakipan sang One Small Ville, Floyd’s, Paraiso, Angel A Bar kag iban pa.
Kalabanan sa mga ginlapas ang anti-smoking, wala sang Close Circuit Television camera, wala sang guwardiya kag bouncer lakip na ang pagserbe sang makahulubog nga ilimnon sa mga menor de edad.
Samtang, nakakuha man sila suno kay Canong sang kuha sang CCTV footage sang Angel A Bar sa diin may mga menor de edad nga nag-ako nga nag-inom sila sang makahulubog nga ilimnon.
Bangud nga indi klaro ang kuha sang CCTV footage, pagabasehan na lang nila suno kay Canong ang pahayag sang duha ka mga menor de edad.
Nakadepende naman sa alklade ang pagdesisyon sa pagpasarado sa nasambit nga bar.
