ILOILO CITY- Nasikop sang mga otoridad ang siyam ka mga durugista sa ginpatigayon nga buy bust operation sa Brgy. Desamparados, Jaro, Iloilo City.
Ang mga nadakpan amo sanday Josias Amilo nga ginakabig High Value Individual kag subject sang operasyon, Carlos Bitonga, Christian Labordo, Raymond Paguntalan, Kerwin Degron, Eduardo Villosa, Francis Hibionada, Davey Obapial kag Ronald Paterno. Jr nga isa ka Street Level Individual.
Suno kay PLt. Col. Antonio Benitez Jr., chief sang City Drug Enforcement Unit, base sa ila imbestigasyon, ang mga arestado ang nagakuha sang supply sa lugar kun sa diin man sila nagapatigayon sang pot session.
Sa daan nga porsyon sang merkado sang Brgy. Desamparados ginapatigayon sang otoridad ang iligal nga aktibidad.
Nakuha sa ila ang P816,000 nga balor sang suspected shabu.
Natalana nga pasakaan sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
Sa interview sang Bombo Radyo kay Punong Barangay Nestor Lobaton sang Desamparados, iya ginpahayag nga ginlisensya sadto sang live-in partner ni Amilo nga gamiton ang porsyon sang daan nga merkado agud butangan sang ihaya nga patay kag sang ulihi, naghingyo nga kun mahimo nila maistaran temporaryo.
Wala naghaum si Lobaton nga gamiton ini nila para sa iligal nga aktibidad.
