Siyam na ka mga boksidor halin sa Pilipinas ang may sigurado na nga silver medals apang posible manghakot sang bulawan nga medalya kun makasabak na sa gold medal round sang 32nd Southeast Asian Games.
Kwalipikado na sa final match ang Tokyo Olympian nga si Carlo Paalam matapos ginlutos ang Timor Leste via unanimous decision sa semifinals sa men’s 54kg class; kag nagsaka naman sa gold medal match si Paul Bascon matapos gintumba ang kasumpong halin sa Cambodia sa second round sang men’s 60kg semifinals.
Magluwas kanday Paalam kag Bascon, una na nga na-qualify para sa gold medal match sanday Rogen Ladon (flyweight), Ian Clark Bautista (featherweight), John Marvin (light heavyweight), Ilongga boxer Irish Magno (flyweight), Riza Pasuit (lightweight) kag mag-utod nga Petecio nga sanday Nesthy (featherweight) kag Norlan (lightweight).
Nagkabos naman sa kadalag-an si Marcus Tongco matapos nga ginlutos ini sang Vietnam sa men’s 92kg semis kag nag-settle lamang sa bronze.
Tuyo sang boxing squad sang Pilipinas nga lampasan ang rekord sini sa SEA Games sa Vietnam kun sa diin nakadaog ang team sang tatlo ka gold medals, isa ka silver, kag lima ka bronze. #
