Iloilo City – Ginakabalak-an ang padayon nga pagtaas sang numero sang mga napatay sa New Zealand kasunod sang paglaslas sang Bagyo Gabrielle.
Yara na sa siyam ang napatay lakip na ang duha ka tuig nga bata nga babayi, isa ka volunteer firefighter, kag pati man ang amay sang New Zealand professional rugby league footballer nga si Issac Luke.
Sa subong, linibo pa ka mga residente ang yara sa lugar nga apektado sang baha kag landslide nga nagakinahanglan nga i-contact sang gobyerno.
Suno kay Bombo Tess Peeters, international correspondent sa Auckland, New Zealand, may yara pa sa gihapon sa mga syudad kag probinsya nga nadulaan sang suplay sang kuryente kag wala sang access sa matinlo nga tubig.
Ginabulubanta nga 10,000 ka mga indibidwal ang nadulaan sang puluy-an bangud sa bagyo.
Mismo si Prime Minister Chris Hipkins ang nagsiling nga ang Bagyong Gabrielle ang isa sa mga pinakadaku nga natural disaster sa New Zealand sa sulod sang pila ka dekada.
Nagdeklarar naman sa karon ang New Zealand sang national state of emergency nga amo ang pa lang pangatlo sa maragtas sang pungsod.
