Iloilo City – Tuman ang pagpasalamat ni Iloilo City Mayor Jerry Treñas matapos nga nakakuha sang 91.3% ukon 9 out of 10 nga net satisfaction rating nagikan sa mga residente sang syudad.
Ini ang resulta sang ginpatigayon nga survey sang Social Weather Stations.
Sa interview sang Bombo Radyo kay Treñas, iya ginpahayag nga ini ang nagakahulugan lamang nga nakita sang mga pumuluyo ang pag-uswag sang syudad.
Apisar suno sa alkalde, tutukan sang syudad ang paghatag sang solusyon sa problema sang syudad kaangay sang access sa matinlo nga tubig, kag pagtanyag sang dugang nga job opportunities.
Ginpahayag dugang sang natungdan nga hatagan man niya sang atensyon ang traffic management kun sa diin, gin-imbitaran sini ang mga kritiko agud masolusyunan ang problema sa trapiko.
Samtang, nagpasiguro naman ang alkalde sa publiko nga magapadayon ini sa paghatag sang kalidad nga serbisyo para sa kaayuhan sang tanan.
