TUBUNGAN, ILOILO – Nagapati ang punong barangay sang Tagpuan, Tubungan, Iloilo nga nadalahig lang ang Sangguniang Kabataan (SK) Chairman nga ginluthang patay sa Barangay Mayang sa nasambit nga banwa.
Ang biktima amo si Glenn Bunda, 24 anyos Sangguniang Kabataan (SK) Chairman sang Barangay Tagpuan.
Sa interview sang Bombo Radyo kay Punong Barangay Welmar Tabucuran, iya ginpahayag nga naka-updanay pa sila ni Bunda antes matabo ang krimen apang pagkatapos sang session sa barangay, nagadali-dali ang SK Chairman nga mag-pauli.
Hapon na sang nakabaton sang impormasyon si Tabucuran nga may SK Chairman nga natiruhan apang wala man ginpinsar sang punong barangay nga kilala niya ang ginluthang-patay.
Apang sang ginlaragway na ang biktima nga natiruhan, iya napat-od nga si Bunda ang ginpatay.
Suno kay Tabucuran, wala sang bad records ang SK Chairman sa ila nga barangay amo man sa police station kag mapisan man ini nga sahi sang bata.
Kuntani pahayag sang punong barangay, wala na gindalig pa ang amo nga SK Chairman bangud may yara pa ini sang bwas damlag kag handom sa kabuhi.
Samtang ginpanginwala naman sang iloy ni Harold Tablazon, 33 anyos, Barangay Kagawad sang Ago,Tubungan, Iloilo nga myembro sang New People’s Army ang iya bata.
Suno kay Nena Delia Tablazon, makabig nga “bread winner” ang iya nga bata bangud nagabulig gid ini sa kinahanglanon sa sulod balay kag wala man ini sang kontra.
Pahayag sang iloy, wala sang kaluoy ang nagpatay sa iya anak bangud daw kaangay nga indi na makilala ang nawong ni Harold.
Apang gin-ako naman sang utod ni Harold Tablazon nga nangin myembro sang rebelde nga grupo ang Barangay Kagawad sang tuig 2008.
Suno kay Kath Tablazon, isa lang ka bulan nga nagtinir sa babaw bukid ang iya utod kag naglisensya nga magbalik sa ila pamilya bangud wala ini makaagwanta sang sitwasyon kaupod ang New People’s Army bangud gin-masakit ini.
Ginhangkat man sang utod si PLt. Jose Rommel Samson, hepe sang Tubungan Municipal Police Station nga masolbar ang kaso ni Harold Tablazon.
