Ginkumpirma sang Criminal Investigation and Detection Group nga isa ka incumbent Sangguniang Kabataan Chairman ang isa sa duha nga mga nadakpan sa ginpatigayon nga entrapment operation sa Estancia, Iloilo.
Ini amo si Earvin Shin Guna, 22-anyos, residente sang Calumpang Poblacion, Zone 2, Estancia, Iloilo kag nagakandidato man bilang Sangguniang Bayan Member.
Nadakpan man si Junjun Bagona, 42-anyos residente man sang nasambit nga lugar kag ginapahayag nga tiyo man lang sang SK chairman.
Sa interview sang Bombo Radyo kay Police Senior Master Sergeant Edney Matillano, team leader sang Criminal Investigation and Detection Group, iya ginpahayag nga tatlo ka semana man nga gin-monitor ang duha antes natigayon ang operasyon.
Narekober sa ila ang isa ka armas luthang nga may mga bala.
Yara ang mga arestado sa kustodiya sang CIDG Iloilo kag natalana nga magpangatubang sang kaso sa paglapas sang RA 10591 ukon Comprehensive Firearms and Ammunition Regulation Act.
