Madamo na nga mga awards ang nabaton sang Sangguniang Kabataan (SK) Council sang Barangay Rizal, Lapuz Sur, Iloilo City bangud sa ila nga mga hinimuan sa tunga sang COVID-19 pandemic.
Sa interview sang Bombo Radyo kay Joy Jonathan Pescadera, SK Chairman sang nasambit nga barangay, iya ginpahayag nga nangin bentaha para sa iya nga makapartisipar sa mga organisasyon sadto sang siya pa ang naga-eskwela sa kolehiyo bangud nadumala niya sang maayo ang iya liderato sa Barangay Rizal, Lapuz Sur.
Suno kay Pescadera, ginkilala ang ila nga SK Council bilang 3rd runner up ‘Most Outstanding SK Response Against COVID-19’ sang National Youth Commission gikan sa 122 ka mga SK Councils sa bilog nga pungsod.
Magluwas sini, ginkilala man sila sang Iloilo City Government nga ‘Most Active Sangguniang Kabataan’.
Isa sa mga programa sang SK Council amo ang #SIETE sa diin pito ka mga nagkalain-lain nga programa nga nagafocus sa nagkalain-lain man nga mga sector sa komunidad ang ila ginbuligan.
Pahayag sang SK Chairman, ginhatagan nila sang personalized belt bag ang mga frontliners sa ila nga barangay sa diin ini ang gintahi mismo sang mga sastre nga lunsay senior citizens.
Ini ang nakit-an ni Pescadera nga solusyon sa diin apisar indi makaguwa sa balay ang mga katigulangan, may yara sila sang ulubrahon agud nga indi sila makabatyag sang boredom.
Ang belt bag kag facemask ang ginpahimo sang SK Council sa mga sastre sa ila barangay sa diin makabig ini nga Win-Win solution para sa ila.
May yara man sila sang Kariton Library nga nagalibot sa ila barangay sa diin ang mga libro ang gindonate mismo sang ila man nga mga pumuluyo.
Ini ang ginapahulam sa mga kabataan sa ila lugar agud nga may basa-basahon magluwas sa ila mga modules.
Sa palaabuton nga Agusto dugang pa ni Pescadera, plano nila nga hatagan sang pasidungog ang mga kabataan nga naga-excel sa academics, sa sports ukon sa ano man nga extra curricular activities agud nga ma impluwensyahan kag ma motivate man ang iban nga pamatan-on nga magtuon sang maayo.
Ini ang pila lang sa mga pamaagi sang SK Council sang Barangay Rizal, Lapuz Sur nga i-apresyar ang mga kabataan pinaagi sa paghatag sang importansya sa edukasyon.
