ILOILO – Ginduso ni Sanguniang Kabataan (SK) Federation President Bianca Requinto sa Sanguniang Panlalawigan ang pagpatuman sang pagdumili sa paggamit sang plastic.
Ini agud nga makabulig sa pagbuhin sang basura sa kalibutan.
Sa privilege speech, ginplastar ni Requinto ang mga pagsulundan sa iban nga pungsod nga nagadumili ukon nagahagan-hagan sa paggamit sang plastic kasubong sang straw.
Sa baylo suno kay Requinto, nagagamit na sang mga reusable nga gamit kasubong sang reusable straw, tumbler, utensils kag plastic bags.
Santo sa 2015 report sang isa ka international group, 2.27 million ka tonelada sang basura ang natipon sa pungsod sa sulod sang isa ka tuig sa diin 20% diri ang nagakadto sa dagat.
Sa probinsya sang Iloilo nga may yara sang masobra sa 1.9 million nga populasyon, nagalab-ot sa 735 ka tonelada ang basura nga matipon sa sulod sang isa ka adlaw.
Bangud sini, nagalaum si Requinto nga suportahan sang Sanguniang Panlalawigan ang iya ginaduso nga ordinansa.
