ILOILO CITY – Makaselebrar na sang paskwa upod sa ila pamilya ang hosts sang Sonshine Media Network International nga sanday Lorraine Badoy kag Jeffrey “Ka Eric” Celiz.
Ini matapos nga ginbuy-an na sila kagab-i sang House Committee on Legislative Franchises bangud sang ispirito sang paskwa.
Ang pag-release sa duha ang ginpirmahan nanday Committee Chairperson kag Paranaque 2nd District Representative Gus Tambunting kag House Secretary General Reginald Velasco.
Sang nagligad nga semana, gin-contempt si Celiz sang House panel matapos nga nagpamalibad ini nga magsugid sang iya source of information may kaangtanan sa gina-alegar nga P1.8 billion travel expenses ni House Speaker Martin Romualdez.
Si Badoy naman ang gin-contempt bangud sa gina-alegar discrepancies sa iya mga pahayag may kaangtanan sa advertisers sang show.
Ginpahayag ni Tambunting nga ginhatagan man siya ni Celiz sang pangalan sang iya source.
Nagsulat man ang Ilonggo sa panel nga nagapangayo sang reconsideration sa detention order batuk sa iya kag nagpangayo sang pasaylo sa iya nangin paminatasan sa hearing.
Mangin si Badoy suno kay Tambunting ang naghinulsol man.
Ginpahayag sang House panel chair nga ipatawag lang nila liwat ang duha sa tion nga kinahanglan sila.
Pagkatapos sang release, ginpahayag sang duha nga dapat nga respetuhon sang mga otoridad ang constitutionally guaranteed rights.
Ginpakamalaot naman ni Badoy ang mga mamalidha sa lower Huouse kag gin-alegar sini nga ginhambalan sila sang mga ini nga magsulat sang letter of apology antes sila buy-an.
Gin-athag man ni Celiz nga wala siya nakahatag sang pangalan kay Tambunting may kaangtanan sa iya nga source.
