ILOILO CITY- Istoryahan sang Iloilo Provincial Government ang natuhoy sa posibilidad nga nakasulod na sa Iloilo ang mga smuggled nga mga ulutanon halin sa iban nga pungsod kaangay sang China.
Sa interview sang Bombo Radyo kay 3th District Board Member Matt Palabrica, member sang Committee on Agriculture sa Sangguniang Panlalawigan, iya ginpahayag nga makahalangawa ini bangud indi lang ang palangabuhian sang mga magagmay nga mangunguma ang apektado kundi nabutang man sa peligro ang ikaayong lawas sang publiko.
Suno kay Palabrica, indi malayo nga ang iban nga ulutanon nga ginabaligya subong sa merkado sa Iloilo ang smuggled na kag ini ang dapat talupangdon gid sang gobyerno.
Dugang niya, kuntani, tungdan man sang Bureau of Customs(BOC) kag sang Department of Agriculture(DA) ang ila papel sa pagbantay sang mga produkto nga nagasulod sa Pilipinas bangud nagagwa subong nga ginapabay-an lang sang nasambit nga mga ahensya ang smuggling sang sini nga mga produkto.
Nahibaluan nga sa bahin sang Luzon, nagawangal ang mga mangunguma bangud nagapamierdehan na sila sang PHP2.5 million kada adlaw bilang resulta sang pagbakal sang mga konsumidor sang mga smuggled nga ulutanon kaangay sang carrots nga mas malawig ang kabuhi kumpara sa ila lokal nga patubas.
Ginapahayag nga ang nasambit nga produkto ang ginabutangan sang formalin gani mas madugay ang kabuhi sini antes madunot.
