Indi gid makalusot sa kamot sang otoridad sa Cebu ang isa ka lalaki nga vlogger matapos ini nagpatunga sa dalan kag nagpakuno-kuno nga taklong kag nagtuga sang pagpug-ok sang trapiko.
Bisan naham-ot man ang iban nga followers sa ginhimo ni Boss LB (Brian ang matuod nga pangalan) madamo gid ang naugot sa epekto sini sa trapiko sa highway sa banwa sang Consolacion sa northern Cebu.
Si Boss LB mismo ang nag-share sang iya video nga nagakamang-kamang sa highway samtang suksok sang green-colored costume. Ginatawag niya ang iya kaugalingon nga si Snail Man.
Bisan madamo na nga salakyan ang nagabusina sa iya, proud ini sa ginahimo kag naga-ngisi-ngisi pa sang nagpahigad na gid man ini sa dalan.
Masobra sa 18,700 ang reactions sa original video kag masobra 15,000 ang nag-share.
Apang bangud madamo man ang nag-bash sa iya, nag-paguwa siya sang public apology kag nagpadulong sa police station.
“Mo volunteer diay ko nga moadto sa Consolacion Police Station mangayo ko og pasaylo sa akong dakong sayop nga nabuhat nga dili maayo. Og usa pa sad naka cause ko og kasamok sa dan diri sa Consolacion, naka cause ko og trapik ba, mangayo lang gyud ko og dakong pasaylo gyud tungod sa akoang gibuhat nga di mao. Ilabi na nga naghatag og di maayong pagtulon-an sa mga bata,” kabahin sang Facebook post.
Sa pihak sini, nag-rekomendar ang Highway Patrol Group sa Central Visayas (HPG-7) nga pasakaan gid ini sang kaso bangud sa inconvenience nga natuga kag posible pa nga naaksidente ang iban bangud sa iya stunt.
Ginmanduan na ang legal team sang patrol group nga tumuron kun ano nga traffic violations ang nakomiter sang vlogger.
Nagpaandam man ang police station nga final warning na ini sa iban nga vloggers nga pilion man ang ila nga content kag magpili man sang lugar nga indi makaperwisyo sa iban nga mga tawo.
