Nagtuga sang huol sa trabaho ang malala nga snow storm sa New York City, USA.
Sa interview sang Bombo Radyo kay Ludovico Baqueriza III, Bombo International Correspondent, direkta sa New York City, isa ka Ilonggo Nurse kag tumandok sang Ajuy, Iloilo, iya ginpahayag nga nag-umpisa ang malala nga snow storm sang Enero 31 kag nagbundak sang madamol sang Pebrero 1 umpisa las 10:00 sang aga tubtob las 5:00 sang hapon.
Suno kay Baqueriza, ginkansela ang subway operation sa diin ginpauntat ang byahe sang mga bus kag train bangud tuman kadanlog ang mga dalanon.
Daw kaangay suno kay Baqueriza nga naga-eksperyensya sila sang bagyo apang snow lamang ang nagabubu kag tuman man kabaskog ang huyop sang hangin.
Ginpahayag niya nga kada oras, nagadangat sa duha ka pulgada ang kataason sang nagatumpok nga snow sa mga dalanon.
Dugang pa sang natungdan, ginsarado naman ang pila ka mga vaccination center bangud sa mabaskog nga pag-ulan sang snow.
