Nagpasalamat ang Committee on Transportation sang Sangguniang Bayan sang Pavia, Iloilo matapos nagbalik na sa normal ang flow sang trapiko kasunod sang isa ka semana nga temporary road closure sa dalan nga sakop sang construction site sang Ungka II flyover sa Pavia, Iloilo.
Matandaan nga Marso 15 tubtob Marso 21 sang ginpatuman ang temporary road closure agud hatagan ligwa ang installation sang beams ukon girders para sa ginatukod nga flyover sa diin 32 tanan ka mga girders ang gin-install sa sulod sang pito ka adlaw.
Sa interview sang Bombo Radyo kay Sangguniang Bayan Member Jose Maria ‘Pyt’ Trimañez, chair sang Committee on Transportation, iya ginpahayag nga padayon sila sa pagmonitor sang byahe sang mga Public Utility Jeepneys (PUJs) kag private vehicles nga nagalabay sa Pavia Road.
Suno kay Trimañez, ginapasalamatan man nila ang Traffic Management Office sa pagdeploy sang kompleto nga manpower kag traffic auxiliaries sa mga dalanon agud mabantayan kag mamonitor sang insakto ang flow sang trapiko.
Pahayag sang natungdan, wala pa man sang pat-od nga petsa kun san-o ang liwat na naman nga magapatuman sang temporary road closure matapos ginbutang ang bag-o nga batch sang girders.
Nagapasalamat man si Trimañez sa Bombo Radyo sa pagpalapnag sang impormasyon sa tion nga nagapatuman sila sang road closure.
Nahibaluan nga naapektuhan ang dalan sa Ungka II Circumferential Road intersection pakadto sa U-turn slot sang exit sang Christ the King rason nga ginpatuman ang rerouting.
