Ginkumpirma ni Presidente Ferdinand Marcos Jr. nga isaylo sa sektor sang edukasyon ang masobra P26 bilyones nga una nga ginpain para sa mga proyekto sa flood control.
Gin-anunsyo niya ini kadungan sang pagpanguna ni Marcos sang selebrasyon sang National Teachers’ Month kag World Teachers’ Day sa Pasay City, Oktubre 6.
Pahayag sini, ipain ini para sa pagpatukod sang mga classroom, child nutrition, teacher compensation kag teknolohiya sa mga eskwelahan.
“This Administration is also preparing and investing for the long term. The Senate and Congress have already proposed the 2026 budget for DepEd. Meanwhile, we have allocated P26.55 billion for DepEd programs from the funds of the flood control projects, which we have deemed not to be viable,” kabahin sang speech ni Marcos.
“Because we believe that education is the best, the best investment that any nation can make in its people,” dugang sini.
Una na sini ginklaro nga bisan nga ginhimo na nga zero budget ang para sa flood control projects sa 2026, indi mag-untat ang mga programa sang administrasyon para sa imprastraktura.
Magluwas sa mga programa sa edukasyon, may ipain man para sa sektor sang ikaayong-lawas kag sa agrikultura.
Gin-alokar ang P29 billion sa Department of Health (DOH) para sa medical assistance kag pagtapos sa specialty hospitals; P60 billion para sa Philippine Health Insurance Corporation (PhilHealth) agud pasangkaron ang coverage sini; kag masobra sa P39 billion naman ang magakadto sa Department of Agriculture (DA).
Gin-realign ang budget nga para kuntani sa flood control projects matapos madiskubrehan ang mga anomaliya sa public works partikular ang ghost kag substandard nga mga inubrahan nga nagabalor sang binilyon ka pesos.#
