ILOILO CITY– Dako ang bulig sang social media sa pagpangabuhi sang mga tawo apang may yara man ini sang negatibo nga epekto.
Sa interview sang Bombo Radyo kay University of the Philippines Visayas Psychology Professor Monique Muyargas, iya ginpahayag nga subong nga tion sang pandemya dako ang bulig nga nahatag sang social media, bangud ini ang pamaagi agud makapakig-angot sa katapo sang pamilya nga indi mo makaupod sa isa ka balay.
Apisar sang madamo nga kaayuhan nga mahatag sini sa tawo may yara man ini sang negatibo nga epekto sa ikaayong lawas sa diin, sa patag sang Communication, ang tuman nga pagkahilig ukon paggamit sang social media ang makaapekto sa paggamit sang lenggwahe.
Bangud sini nagalain man ang pamaagi sang komunikasyon sang isa ka indibidwal sa diin nagagamit nalang ini sang emoticons kag mga simbolo agud magpahayag sang ila tinutuyo, lakip na diri ang pagbag-o sa vocabulary.
Samtang sa bahin naman sang Emosyon suno kay Muyargas, ang sobra-sobra nga paggamit sang social media ang makahatag sang sala nga sahi sang security sa isa ka indibidwal.
Naganubo man suno sa iya ang pokus ukon konsentrasyon sang isa ka persona bangud mas ginahatagan sini sang pagtamod ang ginahampangan ukon ang mga bagay nga iya makita online.
Sa bahin naman sang ikaayong lawas, ang tuman nga pagbabad sa social media ang makatuga man sang obesity bangud halos sa tanan nga tion nagapungko lang kag wala na sang tion mag-ehersisyo.
Lakip sa malain nga epekto sini sa ikaayong lawas ang ginalakipan sang pagpalanakit sang likod, tuman nga stress, paglain sang sleeping pattern.
