Ginkumpirma sang Tokyo Olympics organizers nga mga may mga atleta na sa sulod mismo sang Olympic Village nga nagpositibo sa COVID-19 pila ka adlaw antes ang Hulyo 23 — ang opisyal nga petsa sang pag-umpisa sang Tokyo Games.
Ang una nga duha ka COVID-19 cases amo ang duha ka South African soccer players.
Sunod nga ginkumpirma sang South African Football Association nga tatlo ang COVID-19 cases halin sa ila nga delegasyon —ginalakipan sang duha ka players kag isa ka video analyst.
Ang players amo sanday defender Thabiso Monyane kag midfielder Kamohelo Mahlatsi.
Naka-quarantine subong ang bilog nga soccer squad sang South Africa kag ginahulat ang test result sang iban nga mga players kag backroom staff.
