ILOILO – Daku ang nangin bulig sang social media sa maduagon nga love story sang isa ka Ilongga kag Amerikano.
Ginpamatu-ad sang mag-asawa nga sanday Ann Salinas-Winston, 42, kag Paul Winston, 52, nga wala sang may ginapili ang paghigugma.
Sa interview sang Bombo Radyo sa ilongga nga si Ann Salinas-Winston sang Sta. Barbara, Iloilo, iya ginpahayag nga nagkilalahay sila sang iya bana nga si Paul paagi sa social media sang 2013.
Suno kay Ann, wala niya ginhuna-huna nga iya gid mapamana ang lalaki nga iya lamang nakilala paagi sa chat kag video call.
Bilang isa ka single mom kag may isa kaanak, ginpahayag ni Ann nga wala niya ginhatag ang lubos nga pagsalig kay Paul agud nga makalikaw sa konsekwensya.
Samtang nagadugay, iya nakilala si Paul nga isa ka maayo nga tawo tubtub nga sila ang nagkitaay kag nagpakasal sang 2016.
Lakip sa nagpabilib kay Ann amo ang kaisog ni Paul nga magpadulong sa Iloilo agud nga makilala ang iya pamilya.
Daku nga pagpanghangkat sa ila relasyon suno kay Ann amonga sa tagsa ka tatlo tubtub apat lang ka bulan lang nagapauli sa Iloilo si Paul bangud nga may yara siya sang negosyo kag trabaho Chicago, Illinois sa Estados Unidos.
Indi man malikawan suno sa natungdan nga may yara sang negatibo nga reaksyon ang iban nga tawo sa ila relasyon apang ginpahayag ni Ann nga ang importante amo nga nagapalangga-anay sila ni Paul.
Nagalaum naman si Ann nga maka-apas sa Estados Unidos kaupod ang iya tatlo ka mga kabataan agud nga makilala sa personal ang pamilya sang iya bana.
