ILOILO CITY – Kabug-usan nga 213 households nga may populasyon nga 854 nagikan sa Danao-Danao Island sa Barangay Polopiña, Concepcion, Iloilo ang makabenepisyo sang barato kag bastante nga potable water supply.
Si Iloilo Governor Arthur Defensor, Jr. ang nagpanguna sa ground breaking ceremony sang P12.845 million nga Solar- Powered Potable Water System sa Badiango Island Resort sa Sitio Danao-Danao.
Sa interview sang Bombo Radyo kay Provincial Administrator Dr. Raul Banias, iya ginpahayag nga ang water system ang ipatuman sa idalom sang Philippine Rural Development Project.
Ang proyekto ang ginpondohan pinaagi sa P10.276 million nga loan halin sa World Bank sa diin ang Department of Agriculture kag provincial government ang may yara sang tag 10 percent nga counterpart balor P1.284 million.
Suno kay Dr. Banias, ginalauman nga matapos ang water system sa Disyembre 11, 2023 sa diin ginalakipan ini sang construction sang water treatment building nga may water tank kag potable water refilling.
Sa tion nga matapos ini, pahayag niya, makabenepisyo diri ang mga residente sang Sitio Danao-Danao amo man ang purok Himulat, Danao, Pasil kag Punta Imo nga may 138 fishing households kag lima ang farming households.
Ang water system ang may kapasidad nga 11,000 liters kada adlaw nga bastante agud maakomodar ang kinahanglanon sang tanan nga residente sa service area kag makakinot pa sila sang 50 percent sang ila nga gasto sa tubig.
Nahibaluan nga ang tubig nga gina-inom sang mga residente ang ginakuha pa sa Sitio Daga-an kag ginabakal sang P70 samtang ang iban naman ang nagabakal pa sa mainland sang purified water nga mas mahal ang presyohanay.
May yara man sang Community Monitoring Team nga gintukod nga amo ang magasiguro sang sustainability sang water system.
Ang nasambit nga water system project ang gin-conceptualize pa sadto sa idalom sang administrasyon ni anay Mayor Banias.
Ginpahayag man sang gobernador nga ang solar-powered water system amo ang direksyon sang probinsya sa pag-shift sa renewable energy.
Sa pagkamatuod, ang probinsya sang Iloilo ang nakabaton sang commendation halin sa United Nations Development Program bangud sa pagpatuman sang renewable energy projects sa mga district hospitals.
