ILOILO CITY- Nagapabilin nga aktibo ang Solid Waste Management Board sang Iloilo City Government.
Sa interview sang Bombo Radyo kay Engr. Niel Ravena, Asst. Department head sang General Services Office kag katapo sang nasambit nga board, iya ginpahayag nga sa tagsa ka quarter, kinahanglan nila nga magsapol agud istoryahan ang mga isyu tuhoy sa Ecological Solid Waste Management Act nga amo ang sentro sang ila trabaho.
Suno kay Ravena, ginatan-aw nila kun ano ang mga isyu kag concern lakip na kun nagasunod ang tagsa ka barangay sa Ecological Solid Waste Management.
Lakip man sa ila trabaho suno sa natungdan amo ang pagpatigayon sang Material Recovery Facility sa tagsa ka barangay.
Bangud kalabanan sa mga barangay sa syudad sang Iloilo ang wala pa sa gihapon nakapatukod sang Material Recovery Facility, nagapati si Ravena nga may yara na sang ginpagwa nga executive order ang alkalde.
Samtang, ginpahayag naman Engr. Noel Hechanova pinuno sang City Environment and Natural Resources Office kag secretariat sang Solid Waste Management Board, nga nagahimo na sila sang alternatibo nga mga tikang para sa mga kabarangayan nga wala sang lugar nga mahimo pahamtangan sang Material Recovery Facility.
Isa sa mga tikang suno kay Hechanova amo ang pag-organisa sa junkshops nga mahimo maglibot sa mga barangay agud kuhaon ang mga mahimo pa mabaligya nga mga basura.
Kapin sa walo tubtob 10 na ka tuig suno kay Hechanova nga ginaduso ang pagpatukod sang Material Recovery Facility apang tubtob sa subong, nagapabilin ini sa gihapon nga problema kag mangin problema man sa palaabuton bangud sa kakulang sang lugar nga mahimo pahamtangan sini.
