Patay ang 16-anyos nga solterito matapos nga ginluthang sang wala pa makilal-an nga indibidwal sa Brgy. Bita-og Gaja, New Lucena, Iloilo.
Ang biktima amo si Chairel Dela Cruz, residente sang Brgy. Inagdangan, Zarraga, Iloilo.
Sa interview sang Bombo Radyo kay Police Corporal Greg Gonce, imbestigador sang New Lucena Municipal Police Station (MP), iya ginpahayag nga nagwa ang biktima sa balay sang iya magulang agud magconnect sa piso wifi malapit lang sa lugar.
Makaligad ang pila ka minutos, may nabatian nga asud-asud nga lupok ang iya magulang.
Sang naggwa ini, naabtan na lang niya ang manghod nga nagahuray-ad, may igo sang bala sa tuo nga bahin sang iya dughan kag wala na sang kabuhi.
Base sa panaysayon sang utod sini, nakadalagan pa ang biktima halin sa ginhulugan sini sang piso wifi tubtob sa likod sang ila puluy-an.
Narecover sa crime scene ang 13 ka basiyo sang 9mm caliber.
Padayon ang imbestigasyon sang kapulisan kag may person of interest na nga ginasundan.
