Wala pa sa gihapon nakit-an tubtob subong ang 14-anyos nga solterito nga gina-alegar nga nalumos sa suba sa Barangay Tagbak, Jaro, Iloilo City kahapon, Hulyo 20.
Ini amo si alyas Kiel, residente sang Zone 5 sa amo man nga barangay.
Sa interview sang Bombo Radyo kay alyas Noy, bestfriend kag upod ni Kiel nga naligo sa suba, iya ginpahayag nga nagsugod sila paligo halin alas-12 sang udto tubtob alas-5 sang hapon upod pa ang walo nila ka kabarkada bisan pa nga mabaskog ang ulan kag madalom ang tubig sa suba.
Suno kay Noy, nagbatyag sang pagkabiring sa tiil si Kiel samtang nagapaligo apang nagpahuway lang ini sang makadali kag nagpadayon gihapon sa paglangoy kag pagpraktis sang backdive.
Ginsita sila sang tanod bangud delikado ang lugar rason nga nagpuli si Noy kag ang iban pa nila nga mga upod.
Ila man ginhagad pauli si Kiel apang wala siya nagsunod kag nahibaloan nga may iban pa siya nga grupo nga nakaupod sa suba sang ulihi siya nakita.
Dugang pa ni Noy, pagkabugtaw niya sang aga, Hulyo 21, didto na lang niya nabal-an nga wala nakapuli si Kiel kag bayo na lang sang bata ang nakita sa lugar sang insidente.
Kaina sang hapon, nagpatigayon sang search and rescue operation ang mga otoridad sa kilid sang suba nga malapit sa ginakaayo nga esplanade kag Green Garden Memorial Park sa Zone 5, Tagbak apang wala pa gihapon nakit-an ang lawas ni Kiel ukon ano man nga palatandaan.
Sa separado nga interview sang Bombo Radyo kay JM Galvez, rescue volunteer sang Emergency Management Volunteer Response Team Inc., iya ginpahayag nga nabudlayan sila sa operasyon bangud sa mga nagkalain-lain nga impormasyon kag pahayag nga ila nabaton.
May yara nagasiling nga nakita pa si Kiel nga nagabakal sa convenience store sang hapon sang Hulyo 20.
Bangud sini, ginapanawagan sang rescue team ang mga nakaupod ni Kiel sang adlaw sang insidente nga magkooperar agud mahibaloan kon ano gid man ang matuod nga natabo kag mabuligan nga makita gilayon ang bata.
Ang suba nga ila ginpaligoan konektado sa sapa sa Buntatala padulong sa Leganes, rason nga magapadayun ang operasyon sang rescue team buwas sang aga sa mga posible nga agyan ukon sang-itan ni Kiel pananglitan man nga nalumos ini.
Sa subong, nagapanawagan ang mga otoridad kag ang pamilya nga kun may nakakita ukon may impormasyon parte kay Kiel, ipahibalo gilayon ini sa barangay ukon sa pinakamalapit nga estasyon sang kapulisan.#
(Article: Bombo Krylle Melliza)
