ILOILO CITY- Wala sang patimaan nga may foul play sa likod sang kamatayon sang 17-anyos nga solterito nga naabtan nga nagabitay sa sulod sang ila nga balay sa Barangay North Baluarte, Molo, Iloilo City.
Sa interview sang Bombo Radyo kay PMajor Marlyn Roquero, hepe sang Molo PNP, iya ginpahayag nga sa ila pagtsekyar sa kwarto, wala sang senyales nga may natabo nga komosyon kag intact man ang tanan nga pagkabutang.
Suno kay Roquero, sa subong indi pa mapat-ud ang rason sang pagpanginmatay sang solterito apang sa inisyal nga pagpangusisa, ginsaway ini sang amay sang iya nobya nga likawan nga mag-updanay sila nga duha sa balay sang babaye.
Pahayag sang hepe, posible nga nagsunggod ukon naglain ang buot sang biktima.
Gindugang man sang natungdan nga antes nagpanginmatay, nakamitlang pa ini sa iya mga abyan nga mahimo nga magabiya na siya kag indi na magbalik.
