ILOILO – Ginapatpat sang Northern Alliance ang pila ka mga solusyon kag plano agud masolbar ang problema sa kalbo nga kabukiran nga ginatunaan sang pagbaha kag paglandslide sa Northern, Iloilo.
Sa interview sang Bombo Radyo kay Concepcion Iloilo Mayor Dr. Raul Bañas, pinuno sang Northern Iloilo Alliance, iya ginpahayag nga nangin “wake-up call” sa gobyerno kag pumuluyo ang pagbaha kag landslide nga natabo sa pila ka mga kabanwahanan sa Iloilo agud magbugtaw na kag solusyunan ang problema sa kalbo nga kabukiran nga ginatunaan sang dalagko nga halit sa pangabuhi.
Suno kay Bañas, nagsinapol ang pila ka mga katapo sang Iloilo Provincial Government, Department of Environment and Natural Resources (DENR) kag lakip na ang Northern Iloilo Alliance agud ipatpat ang mga ipatuman nga ordinansa kaangay sang padayon nga pagtanum sa mga kagulangan sang mga kahoy.
Pahayag ni Bañas, plano man nila sa Concepcion, Iloilo nga magtanum sang mga Cacao bilang alternatibo nga palangabuhian sang pumuluyo.
Dugang pa sang natungdan nga urgent call na ang nagakatabo sa kabukiran agud ibalik sang pumuluyo ang kakahuyan sa kagulangan.
