Ginasigurado sang Malacañang nga patpaton ni Presidente Rodrigo Duterte sa iya ikaapat nga State of the Nation Address subong nga hapon ang padayon nga pagpakigbato sa korapsyon, iligal nga droga kag rebelyon amo man ang tuhoy sa West Philippine Sea.
Suno kay Presidential Spokesman Atty Salvador Panelo, lauman man nga patpaton ni Duterte ang iban nga mga mayor nga isyu sa pungsod kaangay na lang sang ekonomiya kag iya nga legislative agenda.
Dugang pa ni Panelo, ipakigbahin man sang Presidente sa mga Pilipino ang mga kadalag-an sang administrasyon sang mga tinalikdan nga tuig, sa subong nga sitwasyon sang pungsod kag sa mga mangin plano pa ni Duterte sa masunod nga tatlo ka tuig.
Lauman naman nga mangin malip-ot ang SONA sang Presidente apang nagapati si Panelo nga mahimo maglab-ot pa ini sa gihapon sa duha ka oras.
Maga-lecture man si Duterte sa iya mga kritiko tuhoy sa pagpahanugot sini sa China nga makapangisda sa exclusive economic zone sang Pilipinas.
Una na nga ginpahayag ni Presidential Communications Sec. Martin Andanar nga yara sa masobra 45 minutos nga magadugay ang SONA sang Presidente.
