Nag-umpisa na subong nga adlaw, Hulyo 23, ang pag-amat-amat evacuate sang mga apekatado nga residente sang Brgy. Sooc, Arevalo, Iloilo City, sa Sooc Regional Evacuation Center nga nahamtang man sa amo nga barangay.
Ini kasunod sang ginpatuman sang local government ang preemptive evacuation bangud sang padayon nga pagbubo sang ulan kag pagbaha dala sang habagat.
Ang Sooc Regional Evacuation Center nga may kalaparon nga 1,445 square meters, sarang mag-akomodar sang halos 500 ka mga indibidwal.
May yara ini sang kumpleto nga pasilidad para sa mga evacuees, kaangay sang mess hall, storage area, kag mga comfort room, lakip na ang separado nga CR para sa mga persons with disabilities (PWDs).
Sa subong nga tion, 67 ka pamilya na ang nagatenir sa evacuation center.
Sila ang mga residente halin sa Zone 1-A, Zone 1-B, kag Zone 4 sang Brgy. San Juan, Molo, Iloilo City.
Sa interview sang Bombo Radyo kay Rena Presquito, isa sa mga evacuees halin sa Zone 1-B sang nasambit nga lugar, iya ginpahayag nga napilitan sila nga mag-evacuate bangud ang ila puluy-an ang lapit sa baybayon sang Molo.
Suno sa iya, tuman gid ang iya pasalamat sa mainit nga pagbaton kag pagbulig sa ila sa evacuation center.
