ILOILO CITY – Makapalala sa mumps ukon bayuok ang sour foods ukon maaslom nga pagkaon.
Sa pagpaathag sang medical expert nga si Dr. Elvin Tiangha, ang mumps ukon bayuok ang isa ka makalalaton nga balatian tuga sang virus kun sa diin lakip sa mga sintomas sini amo ang hilanat, pagsakit sang ulo kag maskulo, pagbatyag sang kakapoy kag pagkadula sang gana sa pagkaon.
Suno kay Dr. Tinagha, nagabanog ang salivary glands rason nga nagabanog man ang bahin sang guya kag makapalala diri amo ang sour foods nga nagapatunton sang laway.
Kasubong sa COVID-19, wala sang may ginapili nga edad ang bayuok kag madasig ini nga maglaton paagi sa laway kag iban pa nga droplets kag agud nga mahagan-hagan ang ginabatyag nga sintomas, ginapanugyan ang bed rest kag pagtumar sang painkillers kasubong sang ibuprofen kag paracetamol apang ang aspirin ang wala ginapanugyan sa mga naga-edad sang 16 anyos panubo.
Magluwas sa bakuna, ginakabig man nga alternatibo ang pagbutang sang warm ukon cool compress.
Kun mapabay-an, ang mumps ang mahimo nga magresulta sa viral meningitis sa tion nga makalab-ot na ang virus sa outer layer sang utok kag mahimo man ini nga magresulta sa pagbanog sang testicles sang mga lalaki kag matres sang mga babayi.
