Naghatag ang gobyerno sang South Korea sang kantidad nga P30-million para nga mabuligan ang mga pamilya nga apektado sang sunod-sunod nga mga bagyo sa Pilipinas.
Ginpaagi ini sang Republic of Korea sa United Nations World Food Programme (WFP).
Ini nga assistance ang nakabulig sa WFP kag sa Department of Social Welfare and Development (DSWD) nga makahatag sang ayuda sa 14,500 ka mga pamilya nga may kabataan nga rehistrado sa 4Ps (Pantawid Pamilyang Pilipino Program).
Ang mga benepisyaryo santo sa press release sang WFP amo ang mga apektado sang anay Bagyo Kristine (international name: Trami) amo man nanday Bagyo Leon, Marce, Nika, kag Ofel. Pinakamakamamatay si Kristine nga nagtinir sa Philippine Area of Responsibility sang Oktubre 21-25 kun sa diin 97 ang fatalities kag P4.34 billion ang balor sang kahalitan sa sektor sang agrikultura kag imprastraktura.
“The ROK Government hopes that this assistance will support the recovery of the affected areas and help residents in those areas swiftly return to their daily lives,” suno naman kay ROK Ambassador to the Philippines Lee Sang-hwa.
Suno sa WFP, ang mga pamilya sa Albay kag Camarines Sur ang magabaton sang P3,300 nga cash sa duha ka bulan para sa ila pagkaon kag iban nga kinahanglanon.
Ginsiling man sang WFP nga naghatag ini sang suporta sa transportasyon sa DSWD para nga makalab-ot ini sa dugang nga mga bululigan sa Bicol region.
Gindugang sang WFP nga naga-preparar man ini sa mangin epekto ni Super Typhoon Pepito nga subong yara pa sa sulod sang PAR.
