ILOILO CITY — Gindayaw sang Southeast Asia Tobacco Control Alliance ang pagpatuman sang Iloilo City Government sang anti-smoking kag vaping sa syudad.
Sa interview sang Bombo Radyo kay Dr. Domilyn Villareiz, Regional Coordinator sang Southeast Asia Tobacco Control Alliance, iya ginpahayag nga tuman ka importante sa isa ka lugar ang smoke free tourism bangud indi lang ini makabuhin sang polusyon, maka-engganyo man ini sang mas madamo nga turista.
Suno kay Villareiz, tuyo sang ila nga organisasyon nga mag-conduct sang kampanya sang anti-smoking kag vaping sa Iloilo City agud mas mapasangkad pagid ang ordinansa sang syudad.
Ginpahayag man sini nga ginakalipay nila ang mga pamaagi sang Iloilo City Anti-smoking Taskforce (ICAST) bangud napabilin sini sa 100% nga smoke free city ang syudad.
Ginlaragway naman sang natungdan nga isa ka modelo ang Iloilo City sa pungsod Pilipinas bangud sa masanyog nga pagpangampanya batok sa vaping kag pagpanigarilyo.
Nahibaluan nga nagsugod ang kampanya sang Southeast Asia Tobacco Control Alliance batok sa pagpanigarilyo kag vaping sang 2011 kag sa subong, nagalibot sila sa bilog nga Asya agud pasangkaron ang programa.
