𝗜𝗟𝗢𝗜𝗟𝗢 𝗖𝗜𝗧𝗬 — Nagpanugyan ang Iloilo City Disaster Risk Reduction Management Office (CDRRMO) sa mga pumuluyo sang Iloilo City nga ekspektaron ang malain nga tyempo tubtob sa kataposan sang semana.
Sa interview sang Bombo Radyo kay Darwin Joemil Papa, Operation Officer sang Iloilo City Disaster Risk Reduction Management Office, iya ginpahayag nga magapadayon ang epekto sang Bagyong Carina sa syudad tubtob nga indi pa ini makaguwa sa Philippine Area of Responsibility (PAR).
Suno kay Papa, sige-sige nga ginapabaskog ni Bagyong Carina ang pwersa sang Southwest Moonson ukon Habagat rason nga nagapabilin nga mabalod ang coastal areas sang syudad.
Ginpahayag man sini nga may mga tion nga makanay tubtob kasarangan ang pagmadlos sang hangin apang indi gid matumod kon ano oras ini nagaluntad, rason man nga kinahanglan gid nga mangin maaligmat.
Gin-athag man sang natungdan nga kon magpaguwa ang Philippine Atmospheric, Geophysical and Astronomical Services Administration (PAGASA) sang red kag yellow rainfall, may posibilidad nga mangin mabaskog ang pag-ulan sa isa ka lugar.
Nahibaluan nga may yara sang 32 ka mga panimalay ang na-rekord nga naguba sa 15 ka mga barangay sa area sang Arevalo kag Iloilo City Proper bangud sa malain nga tyempo nga nagtuga sang mabaskog nga mga balod.
