𝗖𝗔𝗡𝗔𝗗𝗔 — Gintay-og sang magnitude 6.4 nga linog ang southwestern sang Canada malapit sa Vancouver City.
Suno sa United States Geological Survey, nagsentro ang linog mga 130 ka milya kag kadalumon nga 6.2 ka miles halin sa Tofino, isa ka gamay nga distrito sa Vancouver Island sa Dagat Pasipiko kag yara sa nakatundan nga baybayon sang Canada.
Ginpahayag man sang U.S. Geological Survey nga nabatyagan sang populasyon nga 2,000 sa Tofino ang pagtay-og.
Una nga natukiban ang mahinay nga pag-uyog pasado alas 8 sang aga sa ila lokal nga oras.
Narekord man sang U.S. Geological Survey makaligad ang isa pa ka oras, ang isa pa ka linog nga may kabaskugon nga 5.4 ang nag-uyog mga 115 miles sa nakatundan sang Tofino.
Suno naman sa gobyerno sang Canada, ang linog nga may kabaskugon nga kapin sa 6 ginakabig na nga mabaskog, tubtob sa mga 62 ka milya ang kalayuon nga mahimo makatuga sang kahalitan ilabi na sa indi maayo nga pagkatukod sang mga buildings kag iban pa nga mga estraktura.
Gin-athag man sang U.S. Geological Survey nga wala sang risgo sang tsunami kasunod sang mabaskog nga linog.
Nahibaluan nga ang linog, ang liwat nga natabo wala pa isa ka semana matapos ang nagluntad nga magnitude 5 nga linog sa amo man nga lugar.
Ang nauna nga linog ang nasentro man sa Dagat Pasipiko sa baybayon sang Canada, halos 150 ka milya gikan sa Tofino, kag may pareho nga narekord nga kadalumon.
