CANADA – Gintay-og sang magnitude 6.4 nga linog ang southwestern sang Canada malapit sa Vancouver City.
Suno sa United States Geological Survey (USGS), ang sentro sang linog ang yara 194 kilometers sang southwest sang Port Alice.
Ginpahayag man sang USGS nga nabatyagan sang 2,000 ka mga pumuluyo ang pagtay-og.
Una nga natukiban ang mahinay nga pag-uyog pasado alas 8 sang aga sa ila lokal nga oras.
Narekord man sang USGS makaligad ang isa pa ka oras, ang isa pa ka linog nga may kabaskugon nga 5.4 ang nag-uyog mga 115 miles sa nakatundan sang Tofino.
Suno naman sa gobyerno sang Canada, ang linog nga may kabaskugon nga kapin sa 6 magnitude ang ginakabig na nga mabaskog, tubtob sa mga 62 ka milya ang kalayuon nga mahimo makatuga sang kahalitan ilabi na sa indi maayo nga pagkatukod sang mga buildings kag iban pa nga mga estraktura.
Gin-athag man sang USGS nga wala sang risgo sang tsunami kasunod sang mabaskog nga linog.
Nahibaluan nga ang linog, ang liwat nga natabo wala pa isa ka semana matapos ang nagluntad nga magnitude 5 nga linog sa amo man nga lugar.
Ang nauna nga linog ang nasentro man sa Dagat Pasipiko sa baybayon sang Canada, halos 150 ka milya gikan sa Tofino, kag may pareho nga narekord nga kadalumon.
