Ginalauman ni Senate President Sherwin Gatchalian nga magatambong ang tanan nga senador, lakip na ang mga miyembro sang minorya, sa impeachment trial ni Vice President Sara Duterte nga magasugod subong nga adlaw.
Suno kay Gatchalian, obligasyon sang kada senador bilang senator-judge nga magtambong sa trial agud personal nga mabatian kag masundan ang mga argumento kag ebidensya sang duha ka kampo.
Pahayag pa ni Gatchalian nga indi dapat paghimuon nga venue ang impeachment court agud dal-on liwat ang topiko nahanungod sa pagpili sa iya bilang Senate President.
Kaangot man ini sa ginpasaka ni Senator Alan Peter Cayetano sa Korte Suprema nga nagakwestyon sa legalidad sang anay piniliay.
Suno kay Gatchalian, positibo nga senyales ang pagtambong nanday Senator Loren Legarda kag Robin Padilla sa nagligad nga all-senator caucus kag nagapakita ini nga handa na ang madamo nga senador nga ipahigad anay ang isyu sa liderato kag mag-focus sa impeachment trial.
Pahayag pa ni Gatchalian nga tuman ka importante ang presensya sang nagakaigo nga quorum agud mapadayon ang trial batok kay Vice President Sara Duterte.
Dugang pa sang Senate President nga kuntani mapanubuan pa ang trial days sa impeachment sang Bise agud nga mapadali nga matapos ini kag agud magabalik na sa normal ang dalagan sang Senado.
