Wala gin-ugyunan ni Senate President Sherwin Gatchalian ang plano sang mga otoridad nga makig-negosyar sa isa ka armado nga grupo nga ginatudlo nga nagaprotekta kay Senador Ronald “Bato” dela Rosa sa Mindanao.
Suno kay Gatchalian, indi dapat makig-negosyar ang gobyerno sa isa ka armado nga grupo kag illegal nga nagagamit sang armas.
Suno pa kay Gatchalian, naintindihan niya ang katuyuan ni Interior Secretary Jonvic Remulla nga malikawan ang maduguon nga komprontasyon kag ginatugyan na sini ang estratehiya nga dapat nga pagahimuon.
Sa matandaan nga una na nga ginpahayag ni Remulla nga nagatinguha ang mga awtoridad nga makig-areglo sa isa ka grupo nga wala ginhingadlan agod matugyan si Dela Rosa sa mga awtoridad sa malinong nga paagi.
Suno kay Remulla, posible nga mag-lab-ot sa 10,000 ka tawo ang mapatay kon piliton ang pag-aresto sa senador.
Apang, wala niya gin-athag kon ano ang basihan sang amo nga numero.
Samtang, wala direkta nga nagsabat si Gatchalian kon suportahan niya ang panawagan sang Malacañang nga magsurrender si Dela Rosa kag atubangon ang arrest warrant nga ginpagwa sang International Criminal Court (ICC).
Pahayag pa ni Gatchalian nga importante nga mangin malinong kag hapsay ang sitwasyon agod malikawan ang bisan ano nga insidente ukon aksidente.
Ang arrest warrant batok kay Dela Rosa may kaangtanan sa kampanya kontra droga ni anay President Rodrigo Duterte nga nagapangatubang subong sang crimes against humanity sa International Criminal Court, The Hague, Netherlands.
