ILOILO CITY – Wala anay sang dakpanay nga matabo may kaangtanan sa mandu nga ginadumili-an ang sugal sa namatyan.
Sa interview sang Bombo Radyo kay Iloilo City Councilor Jojo Javellana, chairman sang Committee on Police Matters, iya ginpahayag nga tubtub subong, wala pa sang guidelines nga nabaton ang Iloilo City Police Office sa pagpatuman sang nasambit nga mando.
Sa pagkamatuod suno kay Javellana,gindala sa niya privilege speech kaina sa sesyon sang Sangguniang Panlungsod ang tuhoy sa pagdumili sang sugal sa mga namatyan.
Ginpahayag ni Javellana nga suprtado sang mga kaupod nga konsehal ang iya ginduso nga dapat pahanugutan lang ang sugal bangud nga ini ang nangin tradisyon na sang mga Filipino.
Ang matuod nga katuyu-an sang pagpatigayon sang sugal suno sa Konsehal amo nga malingaw ang mga nagapulaw sa namatyan kag ang tong ang makabulig man sa galastuhan sang pamilya nga nalisdan.
Kun tani suno sa Konsehal, pagadumili-an lang ang sugal kun tuman na ka daku sang taya.
