Mapasar ang Sangguniang Panlalawigan sang probinsya sang Iloilo sang ordinansa nga makapapag-on sang Executive Order ni Iloilo Gov. Arthur Defensor Jr. may kaangtanan sa pagpugong nga makasulod ang African Swine Fever (ASF).
Sa interview sang Bombo Radyo kay Iloilo 2nd District Board Member Rolito Cajilig, iya ginpahayag nga may yara sang committee hearing nga patigayunon sa Pebrero 18 sa diin updan ini sang mga national kag regional agencies agud makahimo ang probinsya sang ordinansa.
Suno kay Cajilig, sa nasambit nga ordinansa nasaad nga nagakadapat hatagan sang silot ukon multa ang madakpan nga nagalapas sa pagsulundan ukon nagapasulod sang baboy sa probinsya sa mga lugar nga affected sang ASF.
Sa tion nga mapasar ang ordinansa pahayag niya, maagi na sa isa ka pagsulundan sang probinsya ang paluparan kag online deliveries.
Samtang doble naman ang paghugot sa pagbantay nga makasulod ang mga baboy nga affected sang virus matapos nga ginapahayag may yara na sang narekord nga ASF sa Masbate.
Suno naman kay Gov. Defensor, gin-abisuhan na ang mga couriers nga indi magbaton sang mga pork products nga halin sa guwa sang Iloilo.
