Ginalauman nga mas mapaayo na ang internet speed kag connectivity pati na sa nabukid ukon uma nga bahin sang pungsod kun makasulod na sa Pilipinas ang Space Exploration Technologies Corporation(SpaceX) — ang aerospace company ni Elon Musk, ang pinakamanggaranon nga tawo sa kalibutan.
Si Trade Secretary Ramon Lopez mismo ang nagkumpirma nga magahatag sang internet services sa Pilipinas ang SpaceX gamit ang Low Earth Orbit (LEO) satellite network constellation nga ginatawag nga Starlink.
Suno kay Lopez, nagahanda na subong ang pungsod para sa registration kag business permit application kasunod sang meeting sa tunga sang ahensya kag SpaceX senior executives.
Wala man gin-athag ni Lopez ang timeline kag ang investment figure para sa launching.
Ang Pilipinas amo ang labing-una nga pungsod sa Southeast Asia nga maka-access sa Starlink nga may yara sang 1,600 satellites.
Ang Starlink amo man ang ginpadala ni Musk sang nagligad sa Ukraine sang ginguba sang Russia ang internet sa amo nga pungsod kasunod sang ila nga pagpang-atake.
