Indi na papasagdan ang nagasampaw-sampaw nga spaghetti wires sa Iloilo City, matapos ginpadasig ni Mayor Raisa Treñas ang pagpangkakas sang mga wala na ginagamit nga kable, nga una nga iprayoridad ang mga judging routes para sa Dinagyang Festival 2027.
Ginpangabay ni Treñas ang Public Utilities Group in Iloilo (PUGI) Team nga magtalana sang klaro nga timeline kag action plan agud mapadasig ang clearing operations, sa iya pagsapol upod sa mga representante sang nagkalain-lain nga telecommunications companies, cable operators kag distribution utility.
Suno sa alkalde, importante ang papel sang PUGI Team sa pag-identify kag pagpangkakas sang mga kable nga wala na ginagamit, nga nagadugang sa indi mahangpan nga hitsura sang mga dalan sa siyudad.
Apang gin-athag ni Treñas nga indi lamang para sa Dinagyang Festival 2027 ang kampanya, bangud target sang Iloilo City Government nga masolusyunan ang problema sa spaghetti wires sa bilog nga siyudad.
Paagi sa mas hugot nga koordinasyon sang PUGI Team kag mga concerned utility companies, ginatuyo sang administrasyon nga indi lamang mangin mas presentable ang mga dalan para sa Dinagyang, kundi mangin mas organisado kag mas luwas man para sa mga Ilonggo, bisita, kag dumuluong.
Text by: Bombo Cyrene A. Nasis
