ILOILO CITY – Yara sa seryoso nga kondisyon sa ospital ang isa ka lalaki sa Spain matapos nga nagtuyo nga magkutkot sang lupa agud nga ihaboy sa kalayo bangud sang lapnagon nga wildfire sa ila lugar.
Ang lalaki amo si Angel Martin Arjona, 50, sang Tabara, Zamora, Spain kag tag-iya sang isa ka construction company.
Suno kay Bombo International Correspondent Maria Edzel Lamparero-Lopez direkta sa Spain, nagkuha sang iya excavation equipment si Arjona agud nga magkutkot kuntani sang buho agud nga malikaw sa dugang nga halit sang wildfire ang ila nga magamay lang nga lugar apang gindakop sang kalayo ang iya nga bayo.
Bangud sini, nag-suprer sang severe burns kag ginhatagan sang emergency first aid sa fire scene antes nga gin-air lift padulong sa isa ka specialist burns unit sa kaiping nga syudad sang Valladolid.
Suno sa iya mga kilala, seryoso ang kondisyon ni Arjona apang conscious ini kag nakapakig-angut pa sa iya asawa.
Ang padayon nga wildfire sa palibot sang Tabara ang nagsugod sa Losacio, Zamora nga nagresulta sang duha ka kamatayon, tatlo ka critically injured persons kag masobra sa 6, 000 ka mga tawo ang nag-evacuate.
Ang widlfire ang padayon nga nagakatabo sa pila ka bahin sang France kag Spain bangud sa tuman ka init nga tyempo sa southern Europe nga nagsugod sang nagligad pa nga semana kun sa diin, nagdangat sa masobra sa 40°C ang temperatura.
