Indi na pagpasugtan sang FIFA nga mag-oversee sang anuman man nga World Cup match subong nga tuig ang Spanish referee nga si Antonio Mateu Lahoz kasunod sang mga reklamo sang football players ilabi na halin kay Argentina captain kag superstar Lionel Messi.
Si Lahoz amo ang in-charge sa quarterfinal game sa tunga sang Argentina kag sang The Netherlands sang nagligad nga semana.
Apisar nagdaog sanday Messi paagi sa penalty shootout, ginsapubliko sa gihapon sang players ang ila mga reklamo sa amo nga referee.
Ini bangud sa kabug-usan nga 120 minutos nga hampang, nagpaguwa ini sang 17 ka yellow cards — lapaw pa sa 16 yellow cards nga ginpakita sang Russian referee nga si Valentin Ivanov sa hampang sa tunga sang Portugal kag The Netherlands sa 2006 World Cup.
Suno kay Messi, dapat nga i-review sang FIFA kun ano ang natabo bangud nagapati siya nga indi nagakabagay si Lahoz para sa amo nga match.
Suno naman sa Argentinian goalkeeper nga si Emiliano Martinez, naghatag sang 10 minutes extra time ang referee bangud luyag sini nga maka-skor pa ang kasumpong nga team sang Argentina.
Gintawag man sini nga arogante ang amo nga referee kag “pinakamalala” nga referee sa World Cup sa Qatar.
Nag-akusar pa si Martinez nga bangud nalutos ang Spain sa tournament, luyag man sang Spanish referee nga ma-eliminate ang Argentina.
